صعب الوجع لمّا تحسّ الدنيي عم بتخونك
وتصير تفتش ع شوية عتم تخبّي فيهن عيونك
وشو صعب لمّا الصدّيق يكون
حارس للمرمى الحابب ترمي بجنونك
صعب الدّمع لمّا الضحكة منّك تنسرق
وتصير تصّلي لو اللي صار حلم ومرق
وشو صعب الغطس بميّة بحر مجويّة
ويهون طعم الوسخ ما دام ما في غرق
صعب الغضب لمّا اللّيل يغطّي إيّامك
وتصير الشمس وهم وتنسرق أحلامك
وشو صعب إن كسّروا جناحتك الفضّية
ورشّوا من ملح الحقيقة تيزيدوا أوهامك
صعب تلّون وراق الخريف بالأخضر
أو تبدُل ريحة تعب بالمسك والعنبر
وشو صعب لمّا كاس الأمل يتكسّر
ويكون حامل معو آخر حبّة سكّر
إرسال تعليق